23. Tsamaea hantle (Koli-a-malla)

Khulu e siile mahe lepalapaleng,

E siile bana ba masea feela,

Ho ikhoantlella ha ba ho tsebe,

Mathata a hloele manolo holimo.

Raka le shoetsoe ke molebo,

Ea neng a re fatela o ile,

Seriti sa rona se ts’irohile,

Joale re aparetsoe ke bofifi.

Lefu la noha ke ho tsamaea e le ‘ngoe,

Hoja ena le molekane,

O ne a tla hlaba mokhosi,

Mabotho a teteane.

Pitsana e ntle ha e jele,

Batho baa fela rona rea sala,

Ho sala rona liesola,

Liesola ntho tse hlokang thuso.

Khoeli e apohetsoe ke maru,

Naleli e khanyang e re siretse,

E siretse mekunyane e e-so ho bone,

Linala li e-so ho chore tsa ho sela-sela.

Re aparetsoe ke bofifi,

Maikutlo a rona a sithabetse,

Pelo lia uba meea e faats’e,

Pelo li nts’o ha re je letho.

Batho re ithoetse meli,

Pelesa e neng e le meja,

E jara mathata a rona ka moka,

Joale e re siile feela.

Khomo boela haeno u holile,

E ea ho bo-nkhono lithakong,

U ba bolelle mathata mahlonoko,

Taba tsa faats’e lena ha li fele.

U ke o re rapelle ho ba baholo,

Khapu-khapu ea mahlohonolo,

Tle ke re lebale sohloho sena,

Seo u re sieang ho sona kajeno.

Ka Teboho C MOHLABI

MORO-KHOTLA