26.  Ra tla ra lahleheloa

Qheku la sala le ‘nosi lithakong tsa matlo,

La hopola bocheng lietsahala,

La hopola koma le pinyane,

Ha ho bashanyana baqachi ba khakala,

Pina tse thata tse sa binoeng baneng,

Koma hae binoe ka hara motse maqaing,

Ra tla ra lahleheloa.

Setsooatsana sa bebenya melomo,

Sa bina pina tsa balimo tsa khale,

Sa bina seqata-majoana le molutsoane,

Ntsoe la reketla moea oa feela,

Sefela la se bina la ba la ikaraba leqhekoana,

Pina ee ke mang ea tla mpinela mohla ke eang?

Ra tla ra lahleheloa.

Ngaka ea tula litlakala ea hloma limapo,

Ea thimola ea etsa seka e laola,

Ea thimola e tsobile moathimola le mositsane,

Kepa e thithibane le mahlo ha a sa bona,

Methokho e loriloeng ke bo Mohlomi ts’imolohong,

Ebe Mokoma ke tla mo nka kae ke mofehlelle?

Ra tla ra lahleheloa.

Sehoba sa oma faats’e ka leoto,

Sa hobela sa bina mokorotlo,

Sa lekisa sa mohla malingoana,

Ngole le hana mesifa ea honyela,

Sa ha banna ba ne ba etsa theko ba ruta bashanyana,

Ke mang ea tla tlala a ithoke ha ke bina pina ee?

Ra tla ra lahleheloa.

Sebopi le sona sa na sa nka letsopa,

Sa e tula sa e sila thumane,

Sa e k’hoefa ka mathe e thape,

Ha mpa ha hana ona matsoho,

A ba a thothomela ke “ramatiki”,

E be ke mang eo ke tla mo fa lefa lee?

Ka tla ra lahleheloa.

Moroka pula a na a nts’a meropa,

A e tilinya a nyolla maru a pula,

Moea oa nkha lesoe ha na melupe,

A nts’a lefiso a fehla lefilo,

Ebe mahlale aa a tla fuoa mang?

Ka tla ra lahleheloa.

Ka Teboho Mohlabi

9.  Lefu la AIDS

Baheso thehang tsebe le utloe,

Lintoa kea li bona tse mahlo-mafubelu,

Li loana mots’eare sera u se bona,

Mara ha a sena lihloela aa oela.

Empa ntoa ke ena ea setla-bocha,

E loanela ka likobong “korosetina,”

Leholiotsoana ha o le bone ha le tla,

Motsoalle oa hau e ba lehlaba-phieo.

Ke maloma a folisa moferekanyi,

Ntho ke ena e ntja ka sefubeng,

E ntja ke le lephako ke sa je letho,

Joale ke se ke utloa mocheso eka kea hlanya.

Ntho ena e etsa larita,

E rinya batho seka maphele,

Ha ena mohau ha e tsebe ts’obotsi,

E hloka le eona “khahle” soare.

Leloko ha lea baneng lea timela,

Ho sala baholo bo-hlooho-putsoa,

Jonna ba tla ts’eetsoa ke mang ka moeta,

Ha eka kajeno lee! ba pata bana ba masea.

Masimo a letse ke thite,

Ts’imo ea mabele ke mofoka,

Metse e setse e le lithako,

Letlaka le lenong ba a ipusa.

Lapeng ha bo khulu,

Ho setse mphutlane khutsana,

‘M’ae le Ntat’ae ba ile bo-ea-batho,

Ho ile le ngoana a qeta ho tsoaloa oa lesea.

Ho thusang ho sebetsa,

Ho thusa ka eng ho sebetsa,

Tsohle tse re li etsang,

Li fetohile lefeela la mafeela.

E be o kae Sankatana oa ts’omong,

E be o tla tla neng ho re namolela,

Kholu-molumo ke ena e metsa batho,

Ha e natse mofo kapa morena fito.

Pepeluma le ena o maketse,

O re mashoa ke ana a mofuta,

A hana litlhare a hana lithupa,

E ea a nontsha aa poka mehlabelo.

Litaola le tsona lia kubuta,

Phalafala e sheba hosele e ea hana,

‘Mantaane mosali a nto le boea,

Masapo joale a hana ka mokhoba.

Li ne li ka tsa kubuta nkhekhe,

Ena ntoa ke e hlotseng lichechefa,

Sera se hlotse le pele se e loana,

Ke ntoa ea likobo lira li mano.

Moruti o saretsoe o sithabetse,

Ngoana lejakane ke enoa o oa kula,

“Fatere” a rapela a ntse a akha letsoho,

Are: “Enoa ke mofu ke mo rapella tsela.”

“Tokotela” le ena o hlajoa ke lihlong,

Bababi o ba khutlisa ntse ba baba,

Jase e ts’oeu o se a  ts’aba ho apara,

Koata se li mo bitsa ngakana-ka-hetla.

Che rea ba bona ba tsamaeang,

Ba phethile leeto ba titimile sebaka,

Empa ba salang ba setse le mehau,

Letsoalo le likoloto bohlatsipa.

Jonna bana ba Thesele ba ithuta,

Ntho tse kholo ba sa hola,

Masea ke ana a bina tebelo,

Bana se ba tseba ho pata bafu.

Ka Teboho Mohlabi